الحضن الصامت
ان كان ولابد نتباعد مش هعاند
بس احضنيني حضن صامت بدون نقاش
تجاهلي دموعي لو نزلت وسيبي الحبل عشان يفلت
مدام فيه طرف عايز يبعد يبقي كرّ طرف القماش
انا شايف ان العتاب هيقل نبعد ماشي ونبقي صحاب
الفراق ده كاس داقه الكل واشمعنا انا اللي اسآل عن الاسباب
وابقي احرقي كل الجوابات وكل ورق كتبه بخطي
واحتفظي بجزء من الذكريات بس بعيد عن بيوت شعري
قويني ببُعدك عني واجهيني بنقطة ضعفي اعلني وقت الغياب
وقبل الفراق هقولك سر كبير وعارف ان سري ف بير
انا طلبت احضنك عشان ارمي جوه حضنك حاجات كتير
اسيب ريحة برفانك اللي سيبتهالي ف كل حضن
اسيب حقايقك واوهامك واخد اللي عيشته عشانك
وبعدل الله نتقاسم الحزن انا حضنتك عشان مابقاش بحن
لاي شيئ ف اوقات فاتت واشوف الذكريات يادوب طشاش
واسف جدا اني اتكلمت وانا اصلا طالب الحضن صامت
بدون نقاش ..
