لسه قادر يبتسم
كان لسه قادر يبتسم
ويبص للشمس اللي بتخش السجون
رغم البيبان يرسم خياله على الحيطان ويكلموا
" لو كان ضروري نموت هنا فـ ضروري حنموت بالسكوت "
كل اما يتعب يفتكر شكل البيوت
شباك حبيبته اللي اتقفل من غير وداع اول ديوانه اللي انقتل
" اهداء الى الحلم اللي ضاع "
والنوم فـ احضان الطريق
صورة صديق مكتوب بخطه فـ ضهرها " وغداً لنا "
يسئل خياله على الحيطان " كان مين انا "
يكتب بدمه على التراب
" السجن اوسع من عيون الاغبيا واضيق كتير من حضن بنت تحبها "
يبدأ يحارب فـ الدموع ويسبها يبلعها يمكن يرتوي
يمكن يموت مسموم باحزان العمى تبيض عينه من الدموع
يتساوى عنده الضل ، بالنور ، بالمفيش
يبتسم ويناجي ضله على الحيطان
" دلوقتي بس اقدر اعيش "
