اول حب في حياتي

أول حب في حياتي
وأنا في رابعه أبتدائي
حبيت بنت الأبله بتاعتي
كنت بحب أروح مدرستي
علشان أشوفها يوماتي
كانت حلوه حلاوه برئيه
كنت بشوفها في كل دقيقه
كنت بخترع مليون الف طريقه
وأنسي معاها كتبي وحاجاتي
أنا لسه فاكر كان أسمها أيه
وأيه اللي كنا بنتكلم فيه
ماضي جميل بياخدني ليه
ماكنتش ساعتها عرفت أهاتي
كنت أشطر واحد في الفصل
علشان بس ألفت أنتباها
وكل الواجب بيكون متحل
علشان مش عايز أتضرب قدامها
فكرت كتير أصارحها
بس ماكنتش ببعت جواباتي
كنت بكره يوم الجمعه
علشان مابشوفهاش
بس كان الوقت بيعدي بسرعه
كنت راسمها في كراستي مابنسهاش
كنت بسرح فيها وياخدني سكاتي
آه تقريباً وأنا في رابعه أبتدائي
كان أول حب في حياتي

 كلمات : محمد سعد